Ef ég ýki stórlega þá get ég sagt að ég hafi sofið fleiri nætur í tjaldi í sumar heldur en í rúmi. Þá er ég að reyna að leggja áherslu á þann fjölda útilega sem ég hef farið í í sumar (N.B. að drepast í skurði í Reykjavík telst ekki sem útilega).

Um helgina var stuðið á Grundó, þar var djammað í 14 - 22 klukkutíma samfleytt (fer eftir hvern maður spyr). Það er sérstaklega skemmtilegt að mæta á svona hátíð í litlum bæ, hvert hverfi á sinn lit og allir skreyta húsin sín, bílana sína, börnin sín, rúllubaggana sína og sjálfa sig í sínum lit (við vorum í bláa hverfinu) og í gærkvöldi komu allir litirnir saman og hvert lita-hverfi var með skemmtiatriði. Síðan var drukkið geðveikt mikið og partý út um allt. Auðvitað var rosalegur rígur milli litanna, gulir voru alveg "Hei grænir kunniði ekki að dansa!" (skemmtiatriði gulra var fjölda-dans), síðan voru rauðir eitthvað lengi á leiðinni og einhver sagði "Venjulega keyra rauðir þessa vegalengd ha haha". Mesti rígurinn var þó á milli bæja, línan "Eruðið frá Ólafsvík!" var alveg mesta dissið.